19 de nov. de 2017

INTERESANTE ENTREVISTA A CRISTINA ASENJO (SONORO MAXÍN)

David Rodríguez Rivada, profesor de música do noso centro, fíxolle unha entrevista moi interesante a Cristina Asenjo, unha das Músicas galegas ilustradas por Laura Romero.

Boas tardes, Cristina, ante todo moitas grazas por acceder a facer esta entrevista. Este curso o Equipo de Dinamización da Língua Galega do noso IES (IES Xesús Taboada Chivite) adicou uns paneis (que estiveron expostos no noso Salón de actos dúas semanas) ás Músicas galegas ilustradas (proxecto de Laura Romero), e seleccionamos unha para cada avaliación. Contigo comezamos este periplo musical: 

Moitísimas grazas ao Equipo de Normalización e Dinamización Lingüística, ao alumnado e a David por esta entrevista. A verdade é que non estou acostumada a falar de min na música cunha perspectiva de xénero e faime moita ilusión. Quero agradecer que sigades o traballo de Laura Romero, que tivo a boa iniciativa de ilustrar as súas compañeiras. 

P. Cal é a túa traxectoria musical? En que grupos e que instrumentos tocaches?

R. O contacto coa música foi algo natural dende a miña nenez. Nacín nunha familia de músicos. Meu pai, tíos, tíos-avós, primos...son músicos.. Na miña familia, nas xuntanzas, tocamos e cantamos. Parte da miña familia traballou no circo como músicos, en orquestras, en bandas de música moderna. 
Eu comecei bailando música popular galega moi pequeniña. Na miña primeira actuación tiña 4 anos. Bailei no ballet folclórico Ourensano, en Asuada, na época do instituto onde recolliamos folclore e descubrín os traballos de campo, o contacto coas verdadeiras cantadoras e bailadoras.  Fun profesora de pandeireta e canto na Escola Provincial de Gaitas da Deputación de Ourense e dirixín o grupo Lembranzas-Solpor. 

Acordeonista de Lamatumbá, e teclista en grupos como Tristetto, Agent V, Ondas Martenot, Cañita Brava ( ;) ),
actualmente toco o acordeón no Puto Coro do Exército Froilanista, en O Sonoro Maxín e o Trío Motobomba. Canto e toco a pandeireta coas Daminificadas. Un non parar !

P. Cal é a canción á que máis agarimo lle tes do teu anterior grupo e por que?

R. Licor Café de Lamatumbá. Pola coralidade da canción, os cantos e bailes da xente, a euforia e rebumbio que provocaba. Sempre era moi ben acollida. Gústame moito escoitárllela ás charangas e ás orquestras. É unha canción ben bonita.


P. Cres que o feito de ser muller inflúe dalgún xeito (positiva ou negativamente) á hora de facer música? Dito doutro xeito: detectaches machismo no mundo da música?

R. Mulleres e homes temos as mesmas capacidades para facer, aprender ou escoitar música. No home e na muller funcionan do mesmo xeito o órgano auditivo, os músculos, temos o mesmo número de dedos, funciona igual o órgano fonador (aínda que produzamos sons de distintas alturas)… non hai ningunha diferenza biolóxica que inflúa para participar da música.

Hai unha historia moi dura na relación que as mulleres poidemos ter coa música na historia da humanidade. 
O patriarcado sempre impediu e enrevesou a través de leis, concilios, dogmas, normas, costumes que a muller gozara ou fixera música dun xeito libre. Proibiron, coaccionaron, impediron e minguaron as posibilidades musicais das mulleres. En tódolas modalidades: escoitar, interpretar música, estudar ou ensinar música, cantar, bailar, compoñer. 


No mundo existe o machismo e no mundo da música tamén. Pero falar do mundo da música é moi amplo.  Dentro da música cada unha vive en diferentes micromundos musicais... 

No meu mundo, que maioritariamente é o mundo dos festivais en Galiza e das salas de concertos, non hai grandes diferenzas de trato entre unha muller música e un home músico. Atopas alguén machista no mundo da música coma no mundo da compra, do ocio ou no traballo. 

No meu grupo eu son a única muller. Sempre me sentín tratada como unha persoa sen que me distinguiran polo meu sexo. Meus compañeiros son defensores dos dereitos das mulleres non só na música, tamén nas súas vidas, o que sempre posibilitou unha situación de igualdade no grupo e facilidade de trato. 

Actualmente as mulleres comezamos a participar e estamos presentes na música en case tódolos ámbitos, xéneros e estilos musicais. 

O incremento de mulleres estudantes de todo tipo de instrumentos é abraiante. Agrupacións só de mulleres, mulleres instrumentistas en grupos masculinos (non só como cantantes…), orquestras de mulleres, mulleres compositoras, etc..

Porén, hai eidos ós que resulta aínda difícil chegar, postos superiores como produtoras, directoras, críticas musicais, organizadoras de festivais...


P. Cales son as motivacións que che levaron a formar parte de O sonoro maxín?

R. Seguir tocando as cancións de Ico ( cantante e compositor) cos meus compañeiros. A comodidade e familiaridade do grupo. 

P. Tes algunha anécdota especialmente graciosa ou divertida que nos poidas contar?

R. Moitísimas… Estabamos en pleno concerto nunha sala moi mítica de Alemaña, onde todas e todos bailaban un montón pero con movementos descoordinados, arrítmicos convulsivos, ninguén ía con ninguén, era grimosamente verdade... cando de repente, din algo en alemán e aparece un home espasmódico dicindo que  paremos de tocar. 

Mentres nos mandaban parar a  sala quedou desaloxada e sen un alma en 10 segundos. 
Paramos de tocar e diríxennos ao camerino, onde nos contan que o chan da sala furara. Abrira o chan cun burato enorme. 
Recollimos os bártulos con máximo coidado e desaloxamos entre policía e demais prevención. 

Quedamos moi chafadas, pois estaba a ser un concerto moi chulo e non o puidemos rematar, pero está claro que esa forma de bailar tiña que provocar algún mal... Hahaha

P. Que é o mellor de actuar en público para ti?

R. Compartir con xente momentos de troula cantando e bailando.  O Sonoro Maxín ten o mellor público que pode ter un grupo. Sempre veñen dispostas a pasalo ben, a bailar. Non teñen prexuízos, son capaces de facer momentos especiais e inolvidabeis para nós.  Gosto moito de interactuar co público que realmente non son público, son a extensión do escenario. Estamos todas e todos ao mesmo pero unhas tocamos e outras non. 


P. Que che parece o máis duro?

R. Ser música é unha actividade itinerante. Sempre hai que desprazarse para tocar. Quizais duros son o desprazamentos e o tempo que transcorre entre que fas a proba de son e tocas no concerto.  Nós tocamos en festivais e na maioría das veces pechamos os festivais ou imos nos postos finais.  As probas de son fanse ao revés que tocan os grupos, é dicir, os últimos proban de primeiros, os penúltimos proban de segundo… e claro, pasa moito tempo. 



P. Cales son as 2 cancións que máis che gustan do teu grupo actual?

R. Son fan de Ico e sempre me sentín afortunada de participar  nas súas cancións. Gústanme todas pero posta a escoller, gústame tocar Máquina a vapor e Así se constrúe unha bomba, e en directo un Mix que facemos de cumbias enganchadas. 


P. Cres que a mocidade galega coñece e consume a música que os grupos como o teu interpretades?

R. Non. A maioría pode coñecer pero non consumir. Eu son profesora de música nun IES e podo dicir que  non chegan a un 10% as ou os que consumen esta música. 


P. Que medidas consideras que se poderían adoptar para ampliar a recepción da vosa música?

R. Medidas que leven á normalización da nosa lingua e da nosa música.  Medidas que lle deran presenza nos currículums de música en calquera nivel educativo, a presenza en medios de comunicación, na radio galega, na Tvg, nos xornais… Non hai estilo musical que non se axeite á nosa lingua. A lírica da nosa lingua está máis que demostrada xa en moitos estilos como o  potente hip-hop galego. 


P. Por que en galego?

R. É a nosa lingua. O sonoro Maxín está moi definido polas súas declaracións de amor a Ourense. Non temos lingua mellor que a nosa.

P. Por que o acordeón?

R. O acordeón é desas cousas que pasan na vida así insospeitadamente. Eu era fan de Lamatumbá. Buscaban un acordeonista e anoteime eu. Nunca na vida o tocara, mais o seu son non era descoñecido para min, pois meu pai é acordeonista. Presenteime a un ensaio e alí quedei. O primeiro día toquei unha nota, o segundo dúas….e así é que toco o acordeón ata agora. Boteille bemoles e saiu a cousa xenial! Idade 27 anos. Para que vos animedes e saibades que nunca é tarde


P. Ademais de instrumentista es profesora de Música en ensinanzas medias. Como describirías a actual situación da túa materia no sistema educativo?

R. Teño unha sensación de fracaso e debilidade da música como materia no sistema educativo. A redución de horas, o absurdo do currículum, a escasa adaptación da educación musical aos medios tecnolóxicos, as diferentes necesidades do alumnado… 

P. Cales son para ti as principais dificultades coas que se atopa hoxe en día alguén que queira adicarse á música?

R. Depende no ámbito que queira exercer terá unhas dificultades ou outras, e de distintas envergaduras. Acho que non é mesmo se queres ser directora de orquestra, profesora de música en ensino medio ou compoñente dun grupo funki.


P. Que lugar cres que ten a música galega no panorama actual? (Non nos referimos á música popular tradicional senón á música popular urbana)

R. Está medrando polo pulo de músicas e músicos que tocan cada vez máis e mellor. A música galega conta con case tódolos xéneros musicais: hai blues, rock and roll, cumbias, hip-hop, swing, punk… O que non hai son espazos para que actuar. Son escasos os medios de comunicación que divulguen os traballos e  dean a coñecer grupos. E a medida que vas subindo escadas  o panorama é desolador. Non existe unha industria musical galega nin recoñecemento oficial e político da cultura musical.


P. Cales son os vosos próximos concertos, proxectos etc?

R.  Os próximos concertos serán en Ourense na Gala do Cancro da Asociación de Cancro. O día 29 de Decembro na sala El Pueblo e  o día 30 de decembro no Auriense. No inverno aproveitamos para ensaiar e variar os concertos. Comezaremos en Febreiro tocando no entroido en Xinzo e iniciaremos unha xira polas salas de Galiza. 


Moitísimas grazas pola túa amabilidade e pola vosa laboura no eido da música. Deica logo.

Moitas grazas a vós. Apertas para todos. Viva Verín!

16 de nov. de 2017

HOXE NA BIBLIOTECA DO CENTRO ESTÁS A SER ATENDIDO EN GALEGO

Ao longo desta semana, na biblioteca do centro estamos a ser atendidos nos distintos idiomas que se imparten no centro.
O luns falouse  en Inglés, o martes en Francés, o mércores en Castelán, hoxe fálase en GALEGO e mañá tócalle a quenda ao Portugués.

15 de nov. de 2017

AS ACTIVIDADES AUDIOVISUAIS DO SAMAÍN NO PORTAL DA LINGUA GALEGA

As tres actividades audiovisuais realizadas para celebrar o Samaín: "O Conxuro das meigas do Chivite", "Non é serio este cemiterio e "O concurso de coreografías de Thriller en galego" aparecen publicadas no PORTAL DA LINGUA GALEGA

14 de nov. de 2017

OS TITORANDOS DO PROGRAMA TEI VALORAN AS PRIMEIRAS SESIÓNS

Agora tócalle a quenda aos titorandos, tres alumnas de 1º ESO analizan o programa TEI:

Brunna Feitosa Dias 1º ESO B


Paréceme que o programa TEI é algo moi beneficioso para todos nós, xa que podemos contar en todo momento con outra persoa que estará disposta a axudarnos a resolver calquera tipo de problema que poidamos ter; xa que esta persoa ten unha certa experiencia no centro, que nós todavía non logramos acadar.

En canto a miña titora non a coñezo moi ben, pero parece moi simpática e espero que nun futuro non moi lonxano, cheguemos a ser unhas boas amigas.

Noemí Martínez Lamas 1º ESO C

Creo que o programa TEI é unha boa idea porque pode axudar a que non teñas problemas, a facer amigos, a coñecer o instituto...Ademais o titor pode ser un novo amigo/a e unha gran axuda neste primeiro ano.

Yaiza Yaquibell Mendoza Mariño 1º ESO C

O programa TEI paréceme moi importante porque se teño algún problema podo falalo co meu titor e tamén fago amigos en 3º ESO.

13 de nov. de 2017

DESEÑO DO ENVASE DUN PRODUTO FEITO CON CASTAÑAS

Alumnos de 3º ESO e de 1º BAC deseñaron o envase dun produto feito con castañas.




Primeiro elixiron un produto (marmelada, crema, mousse, cervexa, paté, galletas, fariña, licor...) elaborado con castañas. A continuación inventaron un nome e fixeron unha etiqueta na que aparecesen os seguintes datos: data de envasado, caducidade, forma de conservación, ingredientes e información nutricional). Por último deseñaron e montaron un envase con diferentes materiais. Completaron o seu traballo escribindo no envase un texto breve, que incitase a compralo ou a consumilo. Estes envases están expostos na entrada do centro e ao lado da sala de profesores do segundo andar.

O LÉXICO DO MAGOSTO

Grazas aos alumnos de 2º ESO, ao longo desta semana aprenderemos novas palabras relacionadas coas castañas e o magosto.


Sobre un dos taboleiros do instituto, locen vistosas unha chea de castañas sobre fondo amarelo. Cada castaña leva un termo coa súa definición.

9 de nov. de 2017

OS TITORES DO PROGRAMA TEI VALORAN AS PRIMEIRAS SESIÓNS

A continuación catro alumnas titoras valoran as dúas primeiras sesións do programa TEI: "Acto de presentación titor-titorando" e "Coñéceo":


Lorena Rodríguez 3º ESO A:

Creo que o programa TEI é unha boa idea, xa que uns rapaces novos, que non saben nada sobre o funcionamiento do centro, poden ter a confianza de preguntarlle a uns compañeiros seus que nun pasado atopáronse na mesma situación ca eles. Ademais, penso que sempre é moito máis sinxelo contarlle unha preocupación ou un problema a unha persoa que a puido ter nun pasado antes que a calquera mestre. Por último penso que é unha boa forma de relacionarse e de aprender uns dos outros.
En canto a miña titorazada parece unha rapaza moi boa e agradable, espero que sexamos amigas axiña e que non teña temor algún a hora de contarme algunha das súas inquedanzas.

María Vega Pazos 3º ESO A: 

O día 30 de Octubro  foron a avisarnos  pola mañá , de que pola tarde íamos a coñecer ao nos@ titorand@ .
 Pola tarde , ao tocar o timbre , foi a buscarnos Eduardo  para baixar ao salón de actos . Alí estaban xa , os de primeiro sentados nas butacas e os de 3ºESO B nas escaleiras . Os de 3ºESO A sentámonos  ao lado dos de 3º da ESO e algún que había de 4º da ESO.
 Chegou Cesár e sentouse na mesa xunto con Aníbal e outra profesora . Cesár xunto con Aníbal deron unha charla duns dez minutos aproximadamente.
Minutos antes de saber quen era o meu tuturando ou a miña tutoranda . A miña cabeza estaba pensando : serei unha boa tutora??? , será unha persoas con problemas ??? , dareino levar a cabo???....
Primeiro ,  empezaron cos de 3º ESO B , “que nervios xa se acerca o momento “ pensaba a miña cabeza.
Por fín , chegou o momento , fun a primeira da miña clase en saber quen era . Chámase Alba , ben ,  xa sabía algo dela.Déronme un diploma e o carné de tutora. Ao acabar de decir os de todos , deixáronnos un rato para falar cós nosos tutorandos.
Despois, dun rato falando con Alba , coñecín un pouco máis dela.Paréceme unha boa rapaza estou contenta e quen me tocou e intentareinno facer o mellor posible.

María Pérez Luis 3º ESO A:

O luns día  30 de outubro acudimos ao salón de actos para coñecer ao noso titorando. Estaba moi nerviosa por saber quen me ía tocar; é dicir, a quen ía apoiar nos momentos difíciles para el ou ela. 
 Cando dixeron o meu nome e o da compañeira saudámonos e otorgáronme un diploma e un carné de titora. A continuación sentámonos e charlamos para presentarnos un pouco e coñecernos mellor. Ela sabe que pode confiar en min e contarme se lle ocorre algo malo.
 A experiencia, de momento, parece moi gratificante e fainos madurar e saber enfrentarnos a futuros problemas da vida.

Sheila Alves Nuñez 3º ESO B:

Esta primeira toma de contacto pareceume bastante boa. Axudoume moito a coñecer a miña titorizada. Ela, a pesar de ser tímida, comentoume onde vivía, se tiña irmás...Eu tamén lle contei cousas miñas. Penso que me portei ben con ela.
Tamén falei con outros alumnos titorizados polos meus compañeiros.

8 de nov. de 2017

II CONCURSO ESCOLAR DE DEBUXO E REDACCIÓN DO DÍA INTERNACIONAL DA MULLER E A NENA NA CIENCIA

As mulleres foron e son vitais no mundo da ciencia.
Que descubrimentos científicos fixeron Hipatia de Alejandría, Bárbara McClintock, Rosalind Franklind, Jane Goodald, Jocelyn Bell, Lisa Meitner...?
En que campo da ciencia traballan as seguintes mulleres: Vanesa Valdeiglesias García, Sonia Villapol Salgado, Alicia Estévez Toranzo, Gloria Revilla López...,  que cos seus traballos de investigación contribúen a mellorar as nosas vidas?.
Hai  algunha muller científica na comarca de Verín ?. E na túa familia?
Indaga sobre o tema e anímate a participar no concurso sobre "As Mulleres e a Ciencia" organizado pola Universidade de Vigo.

Só tes que realizar un debuxo ou unha redacción sobre o papel das mulleres na ciencia.
Para consultar as bases do concurso preme na seguinte LIGAZÓN

7 de nov. de 2017

"SOUTO DA TRABE". PRODUTOS DE CASTAÑAS ECOLÓXICAS


Os alumnos de 4º ESO B, dirixidos pola súa titora Paula Páramo Méndez, redactaron un artigo no que analizan a cadea alimentaria e o valor nutricional de catro produtos elaborados con castañas ecolóxicas pola empresa "Souto da Trabe": 

- Castañas en xarope 
- Marmelada de castañas
- Crema de castañas con boletus 
- Crema de castaña con chocolate.

É un proxecto de dúas irmás da aldea da Trabe, no concello de Vilardevós, que converteron o aproveitamento familiar das castañas nunha empresa agroalimentaria, que transforma o produto para vendelo en tendas "gourmet" de toda España.

Podes ler o artigo premendo na seguinte LIGAZÓN




O POEMA DO POLBO

 Debuxo e poema de Aarón Castro Montecid de 2º ESO A


O polbo encarnado
camuflado entre o mar ondulado
parecendo cabelos desenredados

escondido e preso como
as raíces dunha árbore
mirando e pensando
"onde estará aquel paxaro"
que deixou as súas plumas navegando 
como un barco varado.

4 de nov. de 2017

EN MARCHA A FASE GALEGA DA IX OLIMPÍADA DE XEOLOXÍA!



A IX Olimpíada de Xeoloxía é una actividade convocada pola AEPECT (Asociación Española para la Enseñanza da Ciencias de la Tierra), a Sociedade Española de Xeoloxía e o Colexio Oficial de Xeólogos.
Nesta edición da Fase Galega patrocinan e colaboran a Facultade de Bioloxía de Santiago, Escola Politécnica Superior de Lugo, E.T.S.E de Minas de Vigo e Facultade de Ciencias de Ourense e as probas realizaranse simultaneamente nestas catro sedes.
Para obter máis información sobre as bases da convocatoria podedes premer na seguinte LIGAZÓN

3 de nov. de 2017

RELATOS GAÑADORES SAMAÍN 2017

Se queredes tremer de medo cos relatos gañadores do concurso Samaín 2017, podedes premer na seguinte LIGAZÓN


Os autores dos relatos son:


LIGAZÓN

2 de nov. de 2017

CONSTRÚE UN COMPÁS SIMPLE CUNHA AGULLA, UN IMÁN E UNHA CORTIZA

O 4 de novembro celébrase o VIII día da Ciencia en Galego. Este ano adícase as viaxes científicas. Unha das actividades propostas desde Igaciencia, para conmemorar este día, é construir un compás sinxelo como fixeron os chineses para saber onde está o norte en calquera situación, de día ou de noite. Este invento representou un paso de xigante nas comunicacións marítimas e terrestres. Só precisas unha agulla, un imán é unha cortiza.

Se queres saber como construílo, preme na seguinte LIGAZÓN

31 de out. de 2017

ACTO DE PRESENTACIÓN DAS PARELLAS DO PROGRAMA TEI 2017-2018

Onte 30 de outubro, ás 16:40,  púxose en marcha o "PROGRAMA TEI" (Titoría Entre Iguais) co acto de presentación das parellas alumno/a titor-alumno/a titorizado.
Este programa está deseñado como unha medida preventiva contra a violencia e o acoso escolar. Os/as alumnos/as de terceiro curso de secundaria titorizarán aos de primeiro.
Previamente tiveron lugar varias sesións informativas para o alumnado titorizado, o alumnado titor e as familias. Nestas sesións explicáronse as características do programa, os obxectivos, o procedemento de intervención e o calendario de actividades.




29 de out. de 2017

A TECEDORA DE SOÑOS NA VIII EDICIÓN DO FESTIVAL DE TEATRO ENTRE CULTURAS


O pasado venres 27 de outubro, ás 20:30, tivemos ocasión de ver actuar o grupo de teatro do noso instituto, A Tecedora de Soños, no Auditorio de Verín, dentro da oitava edición do Festival de Teatro ENTRE CULTURAS organizado por La Caja de Pandora.
Ademais dunha adaptación moi orixinal da LISÍSTRATA de Aristófanes, realizada polos profesores de Latín e Grego (Sonia Sanz e Daniel García), o grupo dirixido por Elisa Vilela e Sonia Sanz interpretou en galego catro cadros de Alonso de Santos: UNHA CUESTIÓN DE HONOR, SINCERIDADE, CARTA DE AMOR A SARA E UN BOCADILLO DE MIÚDOS.
A interpretación de todo o elenco foi excelente e moi aplaudida polo numeroso público asistente.
Esta foi a derradeira actuación de parte do alumnado coa Tecedora de Soños, dado que algúns actores e actrices están en 2º de Bacharelato e ese duro curso académico non lles vai permitir seguir cos ensaios, e outros comezan o seu primeiro curso universitario. Botarémolos moito de menos, mais sabemos que o teatro sempre seguirá con eles.
Longa vida ó teatro!!!!!!!!





28 de out. de 2017

NON É SERIO ESTE CEMITERIO




"E os mortos aquí pasámolo moi beeen..."
Por Samaín uns cantos defuntos saíron das súas tumbas e viñeron bailar....ó patio do Chivite!!!!!!
Premede no enlace para ver un cemiterio pouco serio:

https://vimeo.com/239873355


Os mortos son: Alfonso Seoane, Toni Porto, Ana Salgado, Elia Dopeso, Aarón Vaamonte, Noelia Morais e Alicia Paz.
Maquillaxe: Iria Vieito e Esther Santiago.
Gravación: Daniel García e Esther Santiago
Coreografía: Iria Otero.
Voces: Alumnos de Música de 4º ESO.
Piano: David Rodríguez.
Tradución ao galego: Isabel Cota.

25 de out. de 2017

O CONXURO DAS MEIGAS DO CHIVITE

Xa está preto o Samaín... e algo anda a se axitar no ar... Serán as meigas a cabalo das súas vasoiras creando brisas noxentas? Serán os espíritos dos amigos que están fóra? 

Non vos perdades o vídeo CONXURO, creado por tres alumnas de 2º BAC: Sara Guerra, Xiana González e Saioa Zozaya, xunto co profesor, Daniel García Cancio, para celebrar esta importante festa de fin do verán, que dito sexa de paso, case non da rematado!!!


Para visualizar o vídeo premede AQUÍ

E sobre todo... non vos esquezades de celebrar o Samaín como se merece!!!



23 de out. de 2017

CONCURSO DE COREOGRAFÍAS DE THRILLER EN GALEGO

ATENCIÓN alumnado do IES Taboada Chivite!!!!! 
A vindeira semana é SAMAÍN e para celebralo faremos un concurso de coreografías....A ver quen fai a mellor versión de THRILLER, de Michael Jackson!!!!
Tedes que facer e gravar en vídeo unha coreo de dous minutos de duración empregando o audio do vídeo que acompaña este texto, que é unha tradución ó galego, dun fragmento da canción de Michael Jackson, realizada pola profesora Isabel Cota.



Os vídeos enviaranse a:  ofiadeirodalingua@gmail.com
A data límite de envío é o venres 10 de novembro.

Á hora de escoller o gañador, terase en conta:
A calidade da coreografía
A sincronización
A caracterización
A montaxe do vídeo

19 de out. de 2017

MANIFESTO DO ALUMNADO DO CHIVITE EN REXEITAMENTO DOS INCENDIOS FORESTAIS

Hoxe 19 de outubro ás 11:20 da mañá, numerosos alumnos de todos os cursos concentrámonos na entrada do IES Xesús Taboada Chivite. Ademais dun minuto de silencio en nome das vítimas, quixemos facerlles unha homenaxe, mediante a palabra.
Cun motivo, unha razón. Un manifesto, por unha causa:
O total rexeitamento aos incendios forestais.

Aquí está, a continuación o discurso lido:
 MANIFESTO EN REXEITAMENTO DOS INCENDIOS FORESTAIS
Nas últimas semanas, como todos sabemos, as nosas vidas estiveron en xogo.
 Non somos quen de asimilar, o prezo que moitas familias están a pagar agora mesmo, nestre intre, e posiblemente mentres pronuncio estas palabras, un pai, unha nai, un avo… ou unha nena, están chorando de rabia e impotencia porque nada queda… daquelo que chamaban fogar.
 E se fosemos nós? E se estivesemos na súa pel? Onde está agora a Galiza verde que tanto nos enche o corazón?
216 incendios rexistrados, catro vítimas mortais xunto cunha trintena no país veciño, Portugal, que por suposto está terriblemente afectado. Isto non é un problema de España e para España, isto é un suceso enfermizo que se está a espallar á velocidade da luz, e moitos ignoramos as consecuencias que poden conlevar, e o que é peor, AS CAUSAS. Causas que por moito que nos enfade admitilo, residen na errónea política actual.
DEBEMOS POR EN MANIFESTO OS NOSOS DEREITOS, EN ESENCIAL, O NOSO MAIOR DEREITO, A VIDA.
Este dereito estase vendo quebrado, non só polos coñecidos ‘’incendiarios’’ senón por unha serie de intereses moi claros no ámbito estatal, que poden desatar sucesos como os ocorridos nas últimas horas.
SE O POBO FALA, debe ser escoitado. SE O POBO PIDE AXUDA, debe ser axudado. Non témo-los medios suficientes para combatir estas adversidades, e ao igual que nós temos dereitos, os gobernantes teñen DEBERES, deberes que á súa vez deberían ser inamovibles. A nosa terra, está sendo asasinada, e non queremos ver onde reside realmente o problema. Só unidos podemos cambialo.  Informádevos. Cómpre facelo.

Esther Santiago Casares 2º Bach B

A DERRADEIRA REPRESENTACIÓN DO MUSICAL GREASE





Verín tivo o pasado venres trece unha cita ca música, o teatro e o baile. Grease, o musical que representamos este ano con ilusión alumnos e profesores do IES Xesús Taboada Chivite, despediuse dos escenarios nunha emotiva derradeira actuación que non deixou indiferente a ninguén.
Despois de meses e meses de ensaios, vimos reflectido o resultado final no escenario do auditorio de Verín ca tristeza característica que embaza todos os finais. Os aplausos da xente foron unha das moitas mostras de que todo o noso traballo mereceu a pena, de que a suor estaba recompensada e de que ningún de nós ía esquecer endexamais aquel momento.
Esa noite pechamos unha porta nos nosos corazóns, porque Grease foi moito máis que un musical ou un traballo extraescolar. Grease foi facer amigos, compartir experiencias, rir con xente que non coñecías, bailar con amigos e inimigos, viaxar no tempo ata os anos 50 e meterte na pel dalgúns dos protagonistas ata sentir que non somos tan diferentes.
Grease foi un antes e un despois. Para algúns o primeiro e para outros o último, pero para todos unha pegada que vai quedar sempre no noso interior e proba diso foron as bágoas que se derramaron ao saber que era un adeus a Danny e Sandy.
Foi un adeus, si, pero foi un adeus espectacular. Bailamos ata que nos doeron os pés, cantamos ata quedar sen voz e actuamos ata mesturarnos cos nosos personaxes. Fixémolo o mellor posible, porque queriamos que todos aqueles que puxeron un pouco de si mesmos neste musical estivesen tan orgullosos coma nós de ser parte desta marabilla.

                                                                                                                               Sara Guerra Sandoval

18 de out. de 2017

"GALIZA EN CHAMAS": ARTIGO DE ALBERTE BLANCO

Queremos compartir o  interesante artigo "Galiza en chamas", publicado polo noso compañeiro Alberte Blanco (profesor de Tecnoloxía no IES Taboada Chivite) en:


Para lelo preme na seguinte LIGAZÓN

17 de out. de 2017

POEMA IMAXINISTA 4º ESO B "QUEIMAN GALICIA!"

A raíz dos tráxicos incendios acontecidos na Galiza, o alumnado de 4º ESO B quixemos reflectir o deplorable estado no que queda a paisaxe unha vez queimada. Foi por ese motivo que, a grande grupo, creamos un poema imaxinista, aproveitando tamén que estabamos abordando a vangarda imaxinista nestas datas.


Queiman Galicia!

As flores non rin,
a terra está triste
o vento non fala,
as follas non bailan
as nubes choran
o sol está de loito
e as pedras vístense de negro.

10 de out. de 2017

I CERTAME RELATO BREVE ANPA

Convócase o I certame de relato breve patrocionado pola ANPA do IES Xesús Taboada Chivite de Verín.

Temática: libre.

Podedes participar todos os alumnos do centro.

Os relatos teñen que estar escritos en lingua galega.

Haberá tres premios con dotación económica:
- Un primeiro premio con 70 euros.
- Un segundo premio con 50 euros.
- Un terceiro premio con 30 euros.

Os relatos terán unha extensión máxima de 1 DIM-A4 polas dúas caras  escritas a bolígrafo, sen asinar para garantir o anonimato. Serán entregados no despacho de vicedirección dentro dun sobre grande.
Os datos persoais de cada participante figurarán dentro do sobre grande, nun sobre pequeno.

O xurado estará composto por profesores e o departamento de Galego deste centro.

O prazo máximo de entrega será ata o 31 de outubro de 2017.

RESEÑA "MUSICAL GREASE EN OURENSE"




O día 2 de outubro para nós foi algo moi especial, xa que  ``Grease´´ é o noso primeiro musical e representámolo no Auditorio Municipal de Ourense.
Quedamos en reunirnos todos ás 6:45h, para coller o autobús, pero non saímos ata minutos máis tarde.
Cando chegamos alí eran as 7:45h e o primeiro que fixemos foi dirixirnos aos camerinos e colocar o decorado no escenario.
Vestímonos para poder ensaiar algo antes de actuar. Máis tarde comezaron a tomar asento os rapaces e rapazas dos outros institutos.
A función empezou, e todos estabamos moi nerviosos. Escena tras escena o musical representouse e a pesar de que o público non foi o mellor que tivemos, a ovación que recibimos, pagou a pena todos os esforzos durante o curso.
Cando rematou o espectáculo, recollemos todo e encamiñámonos cara o centro comercial para comer, comprar e lecer ata as 16.30h, que foi cando o autobús nos pasou a recoller para realizar a viaxe de volta a Verín.
Temos claro que participaremos no seguinte musical, xa que foi unha experiencia inolvidable.

          María Pérez e Laura Seoane, 3º ESO A.

9 de out. de 2017

CONCURSO RELATOS SAMAÍN 2017

Samaín está a piques de chegar!
A Biblioteca do IES Xesús Taboada Chivite organiza un concurso de relatos de terror...
Anímate a participar e fainos tremer de medo. Ponte a escribir xa!!!

7 de out. de 2017

BLOG LAURA ROMERO

Se queres coñecer a máis «Mulleres Ilustradas», ademais das que aparecen na exposición do instituto, podes consultar a pàxina Web de Laura Romero premendo na seguinte Ligazón


2 de out. de 2017

DOSSIER MÚSICAS ILUSTRADAS

A partir do mércores 4 de outubro poderase visitar a exposición "Músicas ilustradas" de Laura Romero, montada polo profesor Javier Rodríguez.

Se antes de realizar a visita queres coñecer as artistas representadas, consulta o seguinte dossier elaborado pola profesora Isabel Cota. Para consultalo preme na seguinte LIGAZÓN

29 de set. de 2017

VÍDEO MÚSICAS GALEGAS ILUSTRADAS

Durante o mes de outubro e a primeira semana de novembro poderemos gozar no IES Xesús Taboada Chivite de Verín da exposición "Músicas Galegas Ilustradas", de Laura Romero (organizada polo EDLG). O alumnado do noso centro descubrirá todo o talento musical feminino que temos na nosa terra.
No seguinte vídeo podedes escoitar a: De Vacas, Rosa Cedrón, Guadi Galego, Uxía Senlle e SES, cinco das "Músicas Ilustradas".


Deleitádevos coa súa música!

25 de set. de 2017

MUSICAL GREASE NO AUDITORIO DE OURENSE

O vindeiro 2 de Outubro, ás 11:30, no Auditorio de Ourense, terá lugar unha nova representación por parte do alumnado do IES Taboada Chivite do musical Grease en Galego (despois das realizadas no noso propio centro e no Auditorio de Verín). Este musical recibiu o Premio de Innovación e Dinamización Lingüística o pasado curso e nesta ocasión o noso público serán alumnos e alumnas de 3°, 4° ESO e 1°, 2° Bacharelato de Ourense e tamén do IES Rosais 1 e do IES de Teis (ambos de Vigo).

Se queres coñecer máis detalles sobre a actuación preme no seguinte enlace:
Axenda da Concellería de Cultura de Ourense

A continuación tedes unha recopilación de fotos, realizada pola profesora Isabel Cota da representación de Grease no Auditorio de Verín o 10 de xuño de 2017.


20 de set. de 2017

GOZA DA NOSA COMARCA

Se eres alumno do IES Xesús Taboada Chivite danos a coñecer a túa terra natal, comparte os recunchos marabillosos que agocha. Participa no concurso "Goza da túa comarca".
Terás que elaborar unha guía do teu pobo, que incluirá os seguintes apartados: nome do pobo, coordenadas xeográficas, mapa coa xeolocalización, concello, festas e romarías, lugares de interés, rutas, galería de imaxes, etc.
Cada guía  irá acompañada dunha portada na que aparecerá: título, imaxe, data de realización, nome e apelidos do autor e curso. 
Deberás utilizar o formato que a organización facilita para a realización da mesma e que aparece nas bases. 
Tes de prazo ata o 1 de decembro para enviala a ofiadeirodalingua@gmail.com
Para consultar as bases do concurso preme na seguinte LIGAZÓN







18 de set. de 2017

LETRAS DAS CANCIÓNS DO MUSICAL A BELA E A BESTA

Como vos diciamos na entrada anterior, o musical A Bela e a Besta en galego, que se representará durante o curso 2018-9, xa está en marcha. De feito, temos traducidas todas as letras do inglés ó galego. Se queres acceder a elas preme na seguinte LIGAZÓN

A cantar!!!!!

NOVO MUSICAL: A BELA E A BESTA

O vindeiro musical, completamente en galego, que representarán os alumnos e alumnas do IES Taboada Chivite é A Bela e a Besta. Dada a complexidade da posta en escea, nesta ocasión a preparación do musical durará dous anos, polo que non o poderedes ver ata o curso 2018-9. Mais todo o traballo está planificado e parte del xa feito (nunha próxima publicación poderedes acceder ás letras das coñecidícimas cancións, xa traducidas ó galego).
Debaixo tedes un enlace a un artigo no blog do profesor de música David Rodríguez Rivada, director do musical, no que plasma a planificación de A Bela e a Besta para estes dous vindeiros cursos. 
Para acceder ao enlace preme aquí LIGAZÓN

13 de set. de 2017

CONCURSO FOTOGRÁFICO "AS CORES DO OUTONO"

Se eres alumno do IES Xesús Taboada Chivite participa no concurso de fotos "AS CORES DO OUTONO"

  • Se estás cursando 1º ou 2º ESO, o tema da túa foto debe ser: as cores do outono nas follas de plantas autóctonas.
  • Se estás en 3º ou 4º ESO, o tema da túa foto debe ser: as cores do outono nos cogumelos.
  • Se está no Bacharelato, o tema da túa foto debe ser: as cores do outono nas paisaxes.
Cada alumno pode enviar ata tres imaxes a: ofiadeirodalingua@gmail.com.
Cada imaxe irá acompañada dun título, da data de realización  e dunha breve reflexión explicativa en verso ou en prosa.
Tes ata o día 1 de decembro de 2017 para poder participar. Só necesitas a cámara do teu móbil e saír ao campo. Anímate!
Podes consultar as bases do concurso na seguinte LIGAZÓN

12 de set. de 2017

EXPOSICIÓN MÚSICAS GALEGAS ILUSTRADAS




Durante o mes de outubro no salón de actos do instituto contaremos coa exposición da ilustradora e baixista Laura Romero. Trátase dunha serie de ilustracións sobre mulleres relevantes do panorama musical galego. Un xeito de dar máis visibilidade as mulleres na música, onde seguen a ser minoría en case todos os festivais e concertos. Grazas a esta exposición os alumnos poderán coñecer a mulleres relevantes neste campo como: Uxía Senlle, De Vacas, Cristina Aserjo (Sonoro Maxín), Ana Lee (Fresquiños), Xestreu,Belen Tajes e Maritxina ( Voodoo), Olaia, Aida e Sabela (Tanxugueiras), Guadi Galego, Xestreu, Sonia Lebedynski, Rosa Cedrón,etc.


Se queres visualizar a reportaxe sobre esta iniciativa emitida pola Televisión de Galicia preme na seguinte LIGAZÓN


6 de xul. de 2017

O PROXECTO "FACENDO DE VERÍN UN NOVO BROADWAY: O MUSICAL GREASE" GALARDOADO CO PREMIO DE INNOVACIÓN EDUCATIVA E LINGÜÍSTICA

Educación distingue como excelentes cinco proxectos de innovación educativa e lingüística, entre os que se encontra o musical "Grease" en galego.
No xornal "O Faro de Vigo"de hoxe, aparece publicada a noticia. Se pinchades na seguinte ligazón podedes lela.
Ligazón
No seguinte vídeo, realizado por Isabel Cota, podedes ver un recopilatorio de momentos vividos polo alumnado do IES Xesús Taboada Chivite de Verín, que participou no musical Grease en galego.

1 de xul. de 2017

SAIOA ZOZAYA GAÑADORA INSPIRACIENCIA

Saioa, alumna de 1 BAC A,  acadou o primeiro premio do concurso de relatos científicos «Inspiraciencia», na modalidade de relato xuvenil galego, co relato «Gran de pole». Parabéns!.
Na seguinte ligazón podedes ler o relato.
Ligazòn

24 de xuño de 2017

XEOTROPISMOS EN FABAS



Carlos Rodríguez Jiménez, alumno de 1º BAC A,  realizou un experimento para estudar os movementos das raíces e dos talos das fabas en resposta á gravidade: Os xeotropismos



14 de xuño de 2017

SAIOA ZOZAYA FINALISTA DE INSPIRACIENCIA


A nosa alumna de 1º Bacharelato Saioa resultou finalista no concurso inspiraciencia na categoría xoven en lingua galega polo seu relato "Gran de pole". PARABÉNS.

2 de maio de 2017

A PRAZA DO CONCELLO DE VERÍN ENTRE AS MELLORES FOTOS XEORREFERENCIADAS GRAZAS A LÚA

A foto realizada por Lúa Mª Nuñez Álvarez foi seleccionada como unha das mellores do concurso de fotos de paisaxes xeorreferenciadas, dentro do proxecto Nova Carta Xeométrica de Galicia.

http://www.novacarta.eu/node/9


 E non esquezades o premio seguinte relativo a xeolocalización de lugares literarios de Galicia, que teñan que ver coa lingua e literatura galega, que terá lugar durante o mes de maio e un concurso de contos populares xeolocalizados. Nos meses seguintes iranse anunciando os concursos en novacarta.eu

25 de abr. de 2017

DÍA DO LIBRO

Co gallo do Día do Libro o noso alumnado recita algunha das súas obras favoritas en galego, portugués, inglés, castelán, francés e grego. Aquí vos deixamos unha lista de reprodución cos seus vídeos



21 de abr. de 2017

DÍA DA TERRA

A ONU declarou os días 22 de abril como Día da Terra. Desde Igaciencia convídannos a participar. Podedes ver as motivacións e documentos relacionados enhttp://www.earthday.org/   ou http://www.un.org/es/events/motherearthday/:

"Con motivo dese día e de dar a coñecer Nova  Carta  (http://novacarta.eu) na próxima semana convidámosvos a que propoñades aos vosos alumnos utilizar a App NovaCarta que podedes baixar de novacarta.eu e enviar fotos das distintas paisaxes galegas e enviar unha pequena descrición de cada unha coa xeolocalización que tamén envía a App.

En resumo o que envía máis fotos xeolocalizadas das paisaxes galegas desde o día 21 de abril ao 2 de maio conseguirá o primeiro premio de Nova carta (dos 40 que convocaremos durante este ano). Ademáis poñeremos unha páxina coas fotos máis interesantes, citando o nome do autor e o seu centro. De paso aprende a usar a aplicación para as seguintes convocatorias de premios. Por exemplo todo envío de datos debe levar o teu email para poder saber quen  fixo o envío. Lede o minimanual en novacarta.eu"