ARAÑEIRA POÉTICA

Os alumnos e alumnas de Literatura Galega do século XX quixemos verbalizar os nosos sentimentos. Entre as moitas palabras que nos viñeron á mente, algunhas representaron mellor que outras ese convulso mar de emocións, por enérxicas unhas por pousadas e vagorosas outras. Entre elas destacaron "rodopío", "fuxidío", "ronsel" ou "efémero". A súa beleza cautivounos tanto, que as fomos enfiando en versos para que tamén vós sexades parte desta arañeira poética. Que a gocedes!

QUERIDA ROSALÍA POR CARMEN RIVERO

Este ano, imos conmemorar o día de Rosalía de Castro, o 24 de febreiro, dun xeito moi especial, recitando un poema, escrito na súa honra, pola profesora de Ciencias Sociais do noso centro, Carmen Rivero.

No seguinte vídeo, gravado e editado polo profesor de Grego e coordinador TICS, Daniel García Cancio, aparece Carmen Rivero recitando, acompañada á guitarra por  Francisco Jiménez Pérez, alumno de 1º ESO D, . Tamén están todos os alumnos de 1º ESO B, alzando nubes de cartolina. En cada nube está escrita unha destas marabillosas palabras da nosa lingua, escollidas por Carmen : cogomelo, xoaniña, larpeiro, andoriña, fervenza, feitizo, morriña, bolboreta, folerpa, lóstrego, bico, bágoa, axóuxere, berce, meigallo, luar, brétema, treboada, luscofusco e avelaíña.
Podedes ver o vídeo premendo nesta LIGAZÓN

A continuación aparece o fermoso poema adicado a nosa poeta máis universal:

Querida  ROSALíA

(“ Cantarte hei, Galicia,
na lengua gallega,
consolo dos males,
alivio das penas.” )

Rosalía de Castro.

Cantares Gallegos-1852

Querida Rosalía :

Onte  vin nos ollos puros dunha nena,

un tempo novo;

ao escoitar dos seus beizos

este falar  meloso

e puiden albiscar un futuro

 preñado de esperanza,

que sen ti,

 quizais ficaría baleiro.

¿Como esquecer  os teus versos?

Ese amor a Galicia

 que zumegan as túas letras,

asolagando os ollos

e encollendo as entrañas.

dos que amamos esta terra.

¿Como non agradecerche

que rescataras o noso idioma

 para que brille con luz propia?

Cando todo estaba escurecido

 teimaches e teimaches en escribir

 na lingua máis fermosa;

Ceibando  camiños atuídos polas silvas

que  afogaban no esquecemento,

a  supervivencia  nosa.  

¿Como non loarte ,  muller galega

que viviches as penurias desta xente?

se fuches quen de ser muller,

cando daquela era unha eiva,

 e aínda así facer poemas

escribindo na lingua  da pobreza.

¿Como non lembrar  a túa andaina?

 Se fixeches que mulleres coma ti ,

 prenderan o facho que deixaches

honrando o sexo feminino,

que nin é segundo nin é débil;

 e seguen a colocar pedras

construíndo día a día

 este país senlleiro .

¿Como non bendicir o teu nome

  desexando que sigas a facer o que ben sabes?

Dende o infindo lugar onde te atopes,

non deixes que a túa pluma se volva preguiceira

e segue , segue, querida musa,

escribindo palabras fermosas

nesta lingua meiga.

Carmen Rivero  Gallego .

Do Poemario “Berce de peliqueiros”.

COMEZAN OS ENSAIOS DAS COREOGRAFÍAS DO MUSICAL A BELA E A BESTA.

Como vos diciamos nunha entrada anterior, o musical "A bela e a besta", que se representará o vindeiro curso, xa está en marcha. Unha vez traducidas ó galego todas as cancións, temos feitos xa dous decorados (podedes ver a foto dun deles, pendurado na aula de plástica, feito por alumnado de 1 Bac co profesor Javier Díaz) e a derradeira semana de febreiro comezamos co terceiro. Ademais, como podedes ver no cartaz, o vindeiro mércores comezan os ensaios das coreografías deseñadas por Iria Otero. Iria e o alumnado que se apunte a bailar comezarán a traballar na coreo do "Prólogo" (que se convertirá nun tráiler ) , os mércores de 17:00 a 18:00 e na coreo do "Ataque dos lobos", os mércores de 18:00 a 19:00.

PARTICIPANTES EN FOTONTROIDO 2018

Xa están expostas as fotografías e os lemas dos participantes na VI edición do concurso fotográfico "Entroido de Verín".
Podedes visualizalos no blog NORMACIGARRÓN

MARTA GIL, FRANCISCO FERNÁNDEZ E CELIA LÓPEZ NA ENTREGA DE PREMIOS DO CONCURSO "A MULLER E A NENA NA CIENCIA"

O venres 16 de febreiro, os tres alumnos do noso centro: Marta Gil, Francisco Fernández e Celia López, galardoados no concurso de debuxo e redacción "A MULLER E A NENA NA CIENCIA", acudiron ao edificio Politécnico do Campus de Ourense a recoller o seu premio. Ademais puideron participar, xunto con outros 300 escolares,  nos experimentos da  "I Xornada de Divulgación en Ciencia, Tecnoloxía, Enxeñería e Matemáticas"

Se queredes ampliar a información, podedes consultar o artigo publicado no Diario da Universidade de Vigo premendo na seguinte LIGAZÓN

NAMÓRATE EN GALEGO!

Aproxímase o día dos namorados e no Chivite, querémonos en galego.

Na entrada do instituto, ao lado de conserxería, nunha estrutura feita polo profesor Javier Rodríguez con canas de bambú, penduran corazóns con dedicatorias de amor escritas polos alumnos.

OLLOBOI 2018. FESTIVAL AUDIOVISUAL ESCOLAR.

Desde hoxe e ata o 30 de abril podes inscribir a túa curta en Olloboi.com. Nesta páxina atoparás, ademais do formulario e bases desta edición, as curtas gañadoras de cursos pasados e interesantes recursos para elaborar a túa peza (actividades e charlas con profesionais en Aprendo con Olloboi).

Hai premios especiais para a categoría Peque e Plus18. Ademais, recoñecementos á mellor montaxe, interpretación, fotografía, guión, son e arte.

A entrega de premios terá lugar o venres 11 de maio dentro dos actos do Encontro Olloboi. 

Inscríbete  xa na paxina web de OLLOBOI!

AS MÁSCARAS E OS ANTEFACES DOS ALUMNOS DE 1º ESO

Os alumnos 1º ESO realizaron máscaras e antefaces de entroido coa súa profesora de Plástica Margarita García.

VIAQUA E “LA VOZ DE GALICIA” CONVOCAN O IV CONCURSO “GALICIA, AUGA, LITERATURA E RAP”

Viaqua e La Voz de Galicia convocan unha nova edición do concurso enmarcado no Programa “Prensa-Escuela” co que, desde o curso 2014/2015, se destaca a presenza da auga nas grandes obras da literatura galega.  Nesta IV edición, correspondente ao curso 2017/2018, o concurso  formúlase baixo o título “Galicia, Auga, Literatura e Rap”.

O obxectivo é que os escolares de Galicia (de educación primaria e secundaria) dean a súa visión "a modo de rap" sobre pasaxes estelares ou momentos cumio das grandes obras da literatura galega nas que estea presente a auga. Con elo, preténdese contribuír a concienciar sobre o coidado do medio ambiente e da auga como recurso natural escaso.

A diferenza de edicións anteriores, neste concurso os alumnos, de xeito individual ou en grupos dun máximo de 4 alumnos, deberán elixir un poema ou relato entre os grandes clásicos da literatura galega que se atopen no dominio público, e gravarán un vídeo, desde calquera dispositivo, no que versionen a modo de rap o poema ou relato elixido.

Se vos animades a participar, podedes consultar as bases premendo nesta LIGAZÓN

MARTA GIL E PAULA GAGO, DE 1º ESO, METEORÓLOGAS POR UN DÍA

Nos seguintes vídeos aparecen dúas alumnas de 1º ESO, Paula Gago e Marta Gil, predecindo o tempo atmosférico na clase de Bioloxía. Un bo xeito de aplicar os contidos impartidos pola súa profesora Rosario Romero.
A gravación e montaxe dos vídeos corresponde ao  profesor Daniel García Cancio.


Marta Gil Pérez predice o Tempo from DANIEL GARCIA CANCIO on Vimeo.



Paula Gago Prieto from DANIEL GARCIA CANCIO on Vimeo.

TRES ALUMNOS DO CHIVITE PREMIADOS NO CONCURSO "A MULLER E A NENA NA CIENCIA"

Tres alumnos do centro foron galardoados no concurso de debuxo e redacción, organizado pola Universidade de Vigo, "A MULLER E A NENA NA CIENCIA". A entrega de premios terá lugar o venres 16 de febreiro, entre as once e as doce da mañá,  no Campus de Ourense.

Os premiados son:
- 1º premio de redacción: Francisco Fernández Rodríguez de 3º ESO con "Sophie Germanie".
- 2º premio de redacción: Marta Gil Pérez de 1º ESO con "Como descubrín a ciencia".
- 2º premio de debuxo: Celia Mª López Álvarez de 3º ESO con "As mulleres na ciencia".