PROGRAMA PILOTO DA EMISORA PODCAST RADIOCHIVITE

O día 26 de xaneiro a emisora podcast radioChivite do IES Xesús Taboada Chivite emitiu o seu programa-piloto . 
Neste primeiro programa, Xabier Álvarez, profesor de Lingua Galega e coordinador desta actividade danos a benvida a este espazo radiofónico e invita a todos os membros da nosa comunidade educativa a colaborar nesta iniciativa para que radioChivite sexa unha radio viva.
Cada programa contará con distintas seccións nas que participarán: a Biblioteca, o EDLG, os distintos departamento didácticos, a dirección, o alumnado e todas as voces que queiran intervir.
Desde o EDLG queremos animarvos a que escoitedes este programa piloto. Só tedes que entrar no "Blog da radioChivite" , cuxa dirección é:  https://radiochivite.blogspot.com/ Merece a pena! 
A medida que vaian gravando máis programas, iranos subindo. Colaboremos e apoiemos esta iniciativa!

PUBLICITA UN ORGÁNULO CELULAR EUCARIOTA

O alumnos e as alumnas de 1º de bacharelato, na materia de Bioloxía, simularon ser publicistas dunha empresa, que se adica a construción de orgánulos celulares.

De xeito individual ou por parellas tiveron que deseñar e gravar un anuncio publicitario dun orgánulo celular que lles foi asignado para promocionar a súa venta.

PARABÉNS AO ALUMNADO DE 1º ESO POR ESTOS FERMOSOS "ZENTANGLES"!!!

O alumnado de 1º ESO, coodinado pola súa profesora de Plástica Tatiana Otero realizaron estes fermosos "zentangles", que están expostos nun dos corredores do primeiro andar do noso centro.

O método Zentagle consiste en debuxar libremente patróns deixando voar a nosa creatividade, ao mesmo tempo que a concentración mental neste exercicio consegue relaxarnos. Zentangle: "zen" e "tangle"("enredo" en inglés)

ESTHER ESTÉVEZ CASADO E O SEU PROXECTO "DÍGOCHO EU" DA TVG

Parabéns, parabéns, parabéns á nosa exalumna Esther Estévez Casado por ese gran proxecto que é o #DígochoEu e pola súa enorme profesionalidade!!
Para poder ver a entrevista que lle realizaron no programa "A Revista" da TVG  podedes premer na seguinte LIGAZÓN

CONFERENCIA SOBRE OS BOSQUES DE FRONDOSAS AUTÓCTONAS: CONSERVACIÓN E XESTIÓN SOSTIBLE

A continuación aparece a reseña sobre esta conferencia realizada por María Pérez Luis de 1º BAC B:

 O xoves 16 de xaneiro tivemos a oportunidade de escoitar a un enxeñeiro de montes do Campus de Lugo (USC) para aprender moito máis acerca dos nosos bosques.

   En primeiro lugar, amosounos unha imaxe dunha plantación de eucaliptos, especie frondosa foránea á que se lle adican máis de 300.000 ha en toda Galicia. Isto é debido á gran capacidade de adaptación a diversos terreos e á súa produtividade. Non obstante, a extensión de especies frondosas autóctonas (afortunadamente) é maior, con máis de 400.000 ha de 3 millóns e atópase en aumento debido á despoboación do rural. Algunhas das árbores que podemos atopar nestes últimos son: carballos, freixos, cerquiños, nogueiras, bidueiros, cerdeiras…

   En Galicia tamén se mostra vexetación perenne, (Pinus radiata, piñeiro de Oregón, Pinus pinaster…), mais, onde se presenta maior diversidade é nos caducifolios, por exemplo, A devesa da Rogueira contén unhas 21 formas arbóreas diferentes.

   Tamén se resaltou a importancia da sostibilidade, concepto que se puxo en marcha polas mans das institucións no 1987 e que procura o desenvolvemento social- económico e a protección do medio ambiente de xeito equilibrado.

   A continuación, coñecimos as variantes que podemos atopar no noso territorio:

Soutos: Bosques de castiñeiros, tal e como o Souto de Rozavales (Manzaneda), o cal é un monumento natural. Este posúe un castiñeiro cun tronco de tal diámetro que se precisan aproximadamente unhas 15 persoas para rodealo.

Bidueiros/albelos: Normalmete mesturados con outras especies. Ex: O bidueiral de Montederramo.

Amieirais:  Bosques de amieiros. Un exemplo famoso son os amieiros pintados polo artista Agustin Ibarrola en Allariz.

Bosques de faias: Comúns nas serras de Lugo. Podemos citar á Fraga da Marronda (600ha), presente na Rede Natura e que a pesar de estar ameazada por outras especies, os amieiros xorden con forza ao xermolar ben baixo a sombra e ser propios do terreo.

Bosques de ribeira/galería: Freixos, carballos, bidueiros… Ex: Bosque da fervenza ou a Lagoa de Antela antes de ser desecada.

   Finalmente, tamén descubrimos que moi preto de nós tamén temos verdadeiras paisaxes naturais e faunísticas recoñecidas coma o Parque do Invernadoiro, aínda que este fora froito dunha plantación.

  En definitiva, considero que a información recibida é moi importante porque trataba o noso arredor e impartiuse dunha maneira entendible para todo o público. Ademais, resultou un tema curioso e ameno para aquelas persoas ás que lle interese o rural e a natureza máis achegada.

DIARIO DA VISITA DOS ERASMUS AO NOSO CENTRO POR PAULA GAGO PRIETO

Pavillón do IES Xesús Taboada Chivite

O día dous de decembro, o alumnado estranxeiro chegou ao instituto. Fineses, húngaros, italianos e portugueses, coas súas respectivas maletas, aproximadamente ás once da mañá. Estabamos todos moi nerviosos, tanto alumnos coma profesores, cando chegaron. Veu a banda de gaitas para darnos un pequeno concerto, durou aproximadamente vinte minutos. Ao rematar, levamos ao alumnado á sala de reunións onde os esperaba un gran almorzo, que tomarían mentres os demais desfrutabamos do recreo.

Despois deste, celebrouse unha xincana para romper un pouco o xeo. Ao rematar esta, déronnos unha charla e marchamos á cafetería, onde se celebrou un grande xantar. Despois de comer, realizamos unha visita guiada polo centro para o noso alumnado e así coñecémonos un pouco máis uns a outros; aínda que non todo o que nos gustaría, xa que chegou a hora de ir a clase, o momento de separarnos. Deixámolos na clase de lingua castelá, mentres eu fun a clase de francés. Ao rematar esta hora, reunímonos, e realizamos unha actividade TEI cos titorizados de primeiro e os  alumnos e alumnas de Erasmus.

 Acabouse a xornada lectiva e marchamos a casa, onde se instalou e de alí a un pouco reunímonos cos demais fineses para levalos  a coñecer Verín. Cando se cansaron, marchamos a casa, duchámonos, ceamos e fomos durmir.

O día tres de decembro realizamos moitas actividades xuntos, vimos unha película, tivemos unha charla e corremos unha carreira solidaria para “Save the children” onde se recadou moito diñeiro para as actuacións desta ONG. Pola tarde fixemos unha quedada, para levalos a percorrer Verín e ensinarlles o máis importante.

O mércores, catro de decembro, só realizamos unha actividade xuntas: a degustación dos pratos que deberíamos ter cociñado o día anterior pero que Katarina e máis eu fixemos esa mañá. Pola tarde quedamos tamén con todos os fineses aínda que a desfrutamos menos debido ao exame de bioloxía do día seguinte.

Visita ao Castelo de Monterrei

O xoves, día cinco de decembro realizamos unha actividade similar ao concurso de canción de  Eurovisión no salón de actos, desfrutamos do recreo, vimos unha curta na Casa da Cultura, xantamos e realizamos unha andaina ata o castelo de Monterrei, con visita guiada á torre e a todo o castelo. Despois, levámolos a mercar recordos para eles e os seu familiares. Katarina e máis eu marchamos a clase de

wu-shu ao ximnasio, acompañoume xa que é a actividade que realizo cada xoves. Ao rematar a clase, marchamos a casa a prepararnos para asistir a unha cea que organizamos os alumnos só para nós nun restaurante.

Visita a Santiago de Compostela

O venres, día seis de decembro, fixemos unha viaxe á cidade de Santiago para que o alumnado de Erasmus tivese a oportunidade de coñecer a cidade.

O sábado, día sete de decembro, despedímonos deles ás nove da mañá, choramos todos pero o noso consolo foi que nos volveriamos ver dentro dun ano.

Foi unha experiencia moi bonita, que repetiría durante máis tempo pero nunha época onde o alumnado galego non contara con tanto traballo escolar.

Paula Gago Prieto (3º ESO B)

EXPOSICIÓN DE FOTOS SOBRE O VALOR DOS NOSOS MONTES

Nun dos corredores do segundo andar podedes contemplar a exposición coas mellores imaxes que participaron no concurso fotográfico "O valor dos nosos montes".

CONFERENCIA SOBRE O IMPACTO AMBIENTAL DO ARSÉNICO

O pasado venres día 10 de xaneiro recibimos no noso centro a Xosé Luís Otero, un investigador formado en múltiples campos e que pertence á Universidade de Lugo (asociada á de Santiago). O tema do que nos veu a falar aos alumnos de 4° da ESO e 1° de Bacharelato foi do arsénico coma un contaminante ambiental moi presente no mundo actual. As súas intencións eran claras, ademais de promocionar a súa universidade, pretendía achegarnos a máxima información posible sobre este problema tan descoñecido.

Primeiramente, comezou a describirnos o que causa o arsénico en humanos, morte en doses concentradas e en doses diluídas un gran número de enfermidades cutáneas e mesmo cancro. Despois pasou a explicarnos a situación en Bangladesh, un país do sureste asiático no que millóns de persoas sofren destas lesións por culpa de que os seus pozos de auga, feitos pola OMS están contaminados co devandito arsénico.

Ata o de aquí todo ben, pero despois pasou a explicarnos como foi todo o proceso de investigación ata chegar á verdadeira fonte da contaminación (un sedimento profundo que transmite o arsénico á auga) relatándonos as diversas hipóteses que se barallaron cun vocabulario e unhas explicacións químicas na miña opinión moi técnicas para as idades que tiñamos os espectadores. Con isto o que aconteceu foi que a explicación, aínda que boa, causara a perda de interese de moitos de nós ante a imposibilidade de entendela.

Despois desta primeira parte, pasou a contarnos o experimento que levou a cabo en colaboración con colexiados de Ecuador e Brasil sobre as concentracións de arsénico na auga destes países. Os resultados foron positivos xa que segundo nos explicou, os niveis dos tres estados están dentro do permitido, co engadido de que os niveis de España eran os máis baixos.

Para finalizar aconsellounos sobre como consumir arroz, unha planta que ao crecer inundada, é moi susceptible a contaminarse co arsénico, e suxeriunos lavar e facer unha cocción previa ao arroz que foramos a comer, para minimizar os riscos de inxerir o elemento tóxico.

A presentación foi certamente interesante, xa que nos informou sobre un problema que segundo eu penso é descoñecido para gran parte da poboación, descoñecemento que pode desembocar, como vimos en Bangladesh, en situacións verdadeiramente difíciles. Porén, non creo que fora unha presentación adecuada para rapaces da nosa idade. O primeiro motivo é o uso de tecnicismos demasiado avanzados para nós que comentei anteriormente e segundo, e para min máis importante, que non se pode facer nada en contra do arsénico.

 De acordo co que o conferenciante nos dixo, é unha contaminación 100% natural e que aínda que factores coma o uso de fertilizantes pódena agravar, se hai arsénico nos sedimentos, é moi difícil escapar del. O que a min me produce isto é que aínda que a charla me resultara interesante, pareceme un coñecemento baleiro e un tempo “perdido” que se puido ter empregado en falarnos dun problema ambiental combatible. Charlas deste tipo deberían ser empregadas en que nós, as xeracións do futuro, tomemos conciencia de procedementos incorrectos que se levan a cabo hoxe en día, para que polo menos a longo plazo, se reduzan estes problemas. De todos xeitos foi unha presentación interesante e ben tratada da que puidemos aprender moitas cousas.

Como conclusión quería expresar que aínda que lle atopara algúns fallos a esta conferencia, paréceme ben que se nos saque un pouco do ámbito escolar convencional e que aprendamos e nos conciencemos sobre temas dos que, de outro xeito, non teriamos información ningunha.

Francisco Fernández Rodríguez 1º BAC B

CONTACONTOS SOBRE O APALPADOR NO CEIP PRINCESA DE ESPAÑA

Xusto antes de Nadal os alumnos de 1º da ESO de reforzo (Niko, Salomón e Hiba) decidiron ir contarlle un conto ós nenos e nenas de Infantil do CEIP Princesa de España. 

Os autores da historia foron eles, e dous compañeiros que non puideron ir, Álison e Noé. Xa no cole, eles mesmos lles leron a historia, que falaba dunha nena pobre a quen o Apalpador cumpre un gran desexo: que os seus pais atopen traballo. 

Foi un momento moi especial e emotivo porque despois de estaren moi atentos a todo o conto, pequechos e pequechas recibiron o agasallo do relato (en formato libro caseiro) creado polos nosos e unha carta para que pedisen os seus desexos ó Apalpador. Con ela é coa que posan na foto que vedes na parte superior. 

E...unha cousa máis!: se queredes gozar dos dotes literarios dos nosos alumnos e alumnas, deixámosvos un enlace a este tenro e sentido relato. Premede nesta LIGAZÓN

RALLY MATEMÁTICO E CIENTÍFICO SEN FRONTEIRAS 2020

As datas de realización das probas da edición do 2020 do Rally científico e matemático sen fronteiras son: o 10 de marzo para a proba en centros e o 27 de marzo para a final galega na Facultade de Química de Santiago. Superfinal, en Toulouse, o 10 de maio.
Se estás en 1º, 2º ou 3º da ESO, anima a sete compañeiros da clase e ao teu profesor de Matemáticas a participar.
Se cursas 4º da ESO, podes elixir entre dúas modalidades: Matemáticas ou Física e Química. Fala cos  teus profes de Física e Química ou de Matemáticas, convence a sete compañeiros da clase e facede a inscrición.
Podedes consultar as bases do concurso e que o voso profesor faga a inscrición, premendo na seguinte LIGAZÓN

O RETO ECOLÓXICO DO MES DE XANEIRO É: REDUCE O DESPERDICIO DE ALIMENTOS.

Sabías que un terzo dos alimentos producidos para o consumo humano terminan no lixo cada ano?
Esta comida que desperdiciamos bastaría para alimentar a dous mil millóns de persoas, máis do dobre das que sofren desnutrición no mundo.
O desperdicio de comida é responsable do 8% das emisións mundiais de gases de efecto invernadoiro. Ademais, o 30% da terra agrícola destínase a cultivar alimentos que nunca se consumirán e un 21 % da auga doce emprégase na súa produción.
Como consumidores podemos adoitar sinxelas accións para loitar contra o refugallo de alimentos. Por iso o compromiso ecolóxico que plantexamos este mes é reducir o desperdicio de alimentos.
Se premedes nesta LIGAZÓN podedes consultar algúns consellos para reducir o desperdicio de alimentos nos nosos fogares

Poñede en práctica este reto e enviade imaxes  cun lema e os vosos datos a  ofiadeirodalingua@gmail.com.

Animádevos a participar!!!