"FLASHMOB" SOBRE O REXURDIMENTO DUN BOSQUE QUEIMADO

Desde o noso centro, quixemos sumarnos ás reinvindicacións que teñen lugar hoxe  en todo o mundo en contra do cambio climático, realizando un "flashmob" sobre o rexurdimento das árbores dun bosque queimado.

Alumnos de 1º ESO, 2º ESO , 3º PMAR e 1º BAC leron un manifesto, elaborado por eles mesmos,  sobre o valor dos nosos montes e en contra dos lumes, no patio do instituto, durante o recreo.  
Ao comezo da lectura, quince rapaces de 3º ESO, 1º e 2º de BAC vestidos de negro apareceron encollidos entre as chamas debuxadas con xices no chan, representando un bosque morto. 
A medida que avanzaba a lectura, fóronse erguendo,  un a un, amosando o dorsal dunha árbore viva, que levaban no peito, e simulando o rexurdimento das árbores queimadas.

Nesta actividade participaron catro profesores do Departamento de Lingua Galega (Rosa Alonso, Belén Mellado, Natalia Nóvoa e Xabier Álvarez) , unha profesora do Departamento de Inglés (Isabel Cota), o coordinador TICs (Daniel García) e a coordinadora de Dinamización Lingüística (Guiomar Vázquez).
Podedes ler o manifesto premendo na seguinte LIGAZÓN

RADIO CHIVITE

Se estás interesado en participar nun proxecto de radio escolar en formato podcast acode á reunión que terá lugar o próximo 30 de setembro ás 11: 20 no salón de actos do instituto.
Non podes faltar!!!

CONCURSO DE REDACCIÓN "A MAN CULPABLE"

O Museo do Claustro Mercedario de Verín convoca un concurso de redacción para todos os escolares da Comarca de Monterrei que teñen entre 8 e 16 anos.

A temática é sobre os impactos negativos do ser humano no medio ambiente na contorna da nosa comarca. O cambio climático é un deles, pero tamén os incendios forestais, a contaminación das augas ou a desaparición masiva de especies.

Cada alumno poderá enviar un relato a museodeverin@gmail.com.

Poderanse enviar relatos ata o 15 de outubro de 2019.

O premio é unha cámara Canon EOS 4000D cun obxectivo EF-S 18-55 III.

Para consultar as bases preme na seguinte LIGAZÓN

CONCURSO FOTOGRÁFICO "O VALOR DO MONTE GALEGO"

Se es alumno do IES Xesús Taboada Chivite, sae ao monte e descobre o seu valor. Participa no concurso de fotos "O valor do monte galego".

O tema a retratar é:  O valor económico, ambiental, social, cultural e paisaxístico dos nosos montes.

Cada alumno poderá presentar un máximo de tres fotografías. Cada imaxe irá acompañada dun título, da data de realización e dunha breve reflexión explicativa en verso ou en prosa sobre o beneficio directo (madeira, froitos, pastos, leña, cogumelos, mel, etc.) ou indirecto (redución da erosión, regulación do clima, fertilidade do solo, etc) que aporta o monte na ilustración. 

As imaxes enviaranse en formato dixital a ofiadeirodalingua@gmail.com  . Na mensaxe indicarase o nome do autor/a e o curso.

Tes ata o 31 de outubro para participar. Que non se che pase!

Podes consultar as bases premendo na seguinte LIGAZÓN

ALDEAS RURAIS. NO NOSO HAI FUTURO!!!

O alumnado de 1º BAC B atreveuse a dinamizar unha aldea. Case todos se centraron nas súas, analizando nelas aspectos poboacionais e os principais sectores económicos e produtivos. Logo atrevéronse a comentar novas posibilidades que segundo eles lles darían unha maior vitalidade a ese espazo rural. O obxectivo era loitar contra o abandono do rural e demostrar que na aldea si que se pode vivir, e subsistir. Animádesvos a probar a experiencia de vivir no rural? No noso hai futuro!!!

Para acceder a canle de vídeos preme na seguinte LIGAZÓN

CONSUMAMOS PRODUTOS GALEGOS!!

O alumnado de 1º de Bacharelato C quere animarnos a que consumos produtos elaborados en Galicia, moitos deles descoñecidos polo consumidor galego, que merca unha porcentaxe importante de alimentos procedentes de fóra descoñecendo a exitencia dos nosos.

Canle Consumamos produtos galegos

Para ver o vídeo de Pablo Fernández preme aquí

PARA O NOSO COMPAÑEIRO ANÍBAL BARREIRA

No curso que remata, co gallo da súa inminente xubilación, despedímonos do noso compañeiro Aníbal Barreira: un home discreto, humilde, cordial, traballador e moi querido e lembrado por tódolos seus alumnos.
Amante da historia, Mestre con tódalas letras da palabra e no seu significado primixenio (do latín "magister"), pecha unha etapa adicada ó seu ensino, e deixa unha pegada imborrable en compañeiros e alumnos, non só pola súa cercanía, amabilidade, profesionalidade, senón tamén pola paixón que transmite ó alumnado.
É un home entusiasta do mundo antigo, e un profundo coñecedor do mesmo. Tras formar moitas xeracións de alumnos nesta materia tan importante e necesaria, no momento presente máis ca nunca, tras encher as aulas do Chivite coa súa serenidade e humanidade, tras regalarnos cada día o mellor dos seus sorrisos, a súa colaboración honesta e desinteresada en calquera asunto que se lle plantexase, comeza unha nova vida como persoa xubilada.
Ensinounos que o ensino é unha laboura cooperativa na que todos temos un papel.
Os seus alumnos e exalumnos sempre falan del cunha mestura de afecto e admiración, e os seus compañeiros só temos para el palabras de gratitude.

Feliz xubilación, Aníbal